Van Oosterfüür un Ostereier


Up disse Wüpp muss alln drup.
Een poor Wäken vör Ostersönnabend fangt de Kinner an, all de Strüker to sammeln de de Nabers in ehrn Goarn van de Bööm afsneeden hebbt. Se gaht van Hus to Hus un fragt, of se de Büngels mitnehmen dröfft. Oft heet dat denn: "Ji mööt de aber ok de Sprickels mitnehmen, de ji ünnerwegens up mien Rasen verlorn hebbt." "Ick heff noch'n Sack vull mit oll Zeitungen! " Nehmt wi ok mit!"

Een muss immer Wache schuben, dormit de Hopen nich van anners well in Brand steckt wurr. Poor Ballen Stroh könnt ji ok kriegen! "Wi nehmt alls, wat brennt!" Mit Handwagen oder Wüpp wuur allns insammelt un denn to dat Osterfüür henbrocht un upstapelt. Ut Kartons un Brä harrn wi uns denn ünnern in den Hopen een Höhle boot. Dor kunn man sick good in verstecken un de Gröttern van de Kinner de harrn dor een säkern Stä to'n smöken.
Wi sammelt wat to´t Osterfüür, Heu un Stroh dat is to düür; wüllt ji de Freude mitbeläwen, mööt ji´n paar Schoof Stroh utgäben. Hefft ji kien Stroh, denn geeft us Strüük, dormit weerd ji ok nich riek, hefft ji ok kien´Strüük, denn geeft us Geld, dormit blieft ji ok good stellt. Hefft ji Höhner swart un witt, Eier nähmt wi ok noch mit, hefft ji Höhner swart un gääl, Eier kriegt wi nich to vääl. Laat´us nich lange Stahn, denn wi mööt´noch wieder gahn mööt noch ganz nah't Dörp herupp dor gifft weck´mit de Gropenschupp. Wenn´t sick lohnt harr, säen wi "Danke, danke für die Gaben, die wir hier empfangen haben!" Wenn de Lüü vergrellt weern und nix gäben wull´n (keem awer nich faken vor): "Witten Twirn, swarden Twirn, oole Hexen geeft nich gern!"

Mitnanner warm sück old un jung an't Oosterfüür

Eier söken, Eier trüllen, Eier smieten

Oostersönnabend sammeln all Kinner önnig veel Moos un bauen lüttje Nüster dorut, dormit de Osterhaas de Eier dor in leggen kunn. Elkeen harr sick een good Verteck utsöcht!

Oostersönndag glieks nah't Upstahn gung dat mit ganz Familie na Buten, üm de Eier to söken - man de Oosterhaas harr sick ok anner Vertecken utsöcht - in't Bloemenbeet, in de Astgabel, ünnert Moos, achtern Busch - dat Söken maak allen een bült Spoß.
All Kinner harrn nu een groden Kiep mit'n veele bunte hartkokt Eier - de kunnen se jo nicht all tomol upäten.
Dat eerste Spill geiht so:
All Kinner trüllt immer een Ei - un dat Ei, dat an wietsten komen is un nicht körtgahn is - dat hett wunnen. All Eier, de dat Trüllen nich heel överstahn hebbt, de wurrd upäten. Well an een Diek wohnen dee, de kunn de Eier ok den Diek andahl trüllen.
Dat tweete Spill:
Eiersmieten geiht genau as Eiertrüllen, man du musst dat Ei wiet dör de Luft smieten. Dorbi schall dat Ei ok denn noch heel blieven, wenn dat up'n Grund upsleit. Is de Ünnergrund moi week, denn kunnst Glück hebben - un annerst harrst verloren un de Winner dröff dien Osterei upäten.
Dat drütte Spill:
Bi dat Eierbicken staht twee Kinner gegenanner. Beide kloppt to glieker Tied de Ostereier gegenanner an. Winner is, wessen Ei heel blivt, un de kriggt dat Ei van den Verleerer. Well bi't Eierkoken uppasst hett, de weet, wo sick in't Ei een Luftblas hennsett hett, dor geiht de Schill an eersten kört!
  • Zurück